Manifest Mozilla

Zapokazanje

Internet jo stawnje wažnjejšy źěl našogo žywjenja.

Projekt Mozilla jo gobalne zgromaźeństwo luźi, kótarež wěrje, až wótwórjonosć, inowacija a móžnosći su kluc wobstawnego derjeměśa interneta. Smy wót lěta 1998 gromad źěłali, aby zawěsćili, až internet wuwija se na wašnju, kótaraž jo kuždemu wužytna. Nejwěcej znaty z našych projektow jo webwobglědowak Mozilla Firefox.

Projekt Mozilla zepěra se na zgromaźeństwo, aby wuběrnu softwaru zjawnego žrědła napórał a nowe wašnje kooperacije wuwijał. Załožujomy zgromaźeństwa luźi, kótarež cynje internet k lěpšemu městnoju za nas wšych.

Ako wuslědk toś tych prócowanjow smy rěd principow zestajali, kótarež mamy za kritiske za internet, aby dalej zjawnemu derjeměśeju słužyli a teke komercielnym aspektam žywjenja. Toś te principy pódajomy dołojce.

Cele za manifest su:

1. wiziju za internet artikulěrowaś, kótaruž załožba Mozilla Foundation ma pó měnjenju sobustatkujucych Mozilla spěchowaś;
2. luźam se pśigroniś, njeźiwajucy na jich technisku slězynu;
3. sobustatkujucych Mozilla gjardych na to cyniś, což cynimy a nas motiwěrowaś dalej źěłaś; a
4. wobłuk za drugich luźi napóraś, aby my toś tu wiziju wó interneśe doprědka spórali.

Toś te principy njezwopšawdnjuju se wót samego. Luźe su trjebne, kótarež cynje internet wótwórjony a k městnoju aktiwnego wobźělenja - luźe, kótarež jadnaju ako jadnotliwce, dźěłaju w kupkach gromadu a nawjeduju drugich. Załožba Mozilla Foundation ma nadawk, principy manifesta Mozilla spěchowaś. Pśepšošujomy drugich, se nam pśizamknuś a internet k stawnje lěpšemu městnoju za kuždego cyniś.

Principy

1. Internet jo integralny źěl modernego žywjenja — klucowa komponenta w kubłanju, komunikaciji, kooperaciji, pśekupowanju, rozdrosćenju a towarišnosći w cełku.
2. Internet jo globalna zjawna resursa, kótaryž musy wótwórjona a pśistupna wóstaś.
3. Internet dej žywjenje jadnotliwych luźi wobogaśiś.
4. Wěstota a priwatnosć jadnotliwcow w interneśe stej fundamentalnej a njesměju jej ako opcionalnej naglědaś.
5. Jadnotliwce muse móžnosć měś, internet a swóje dožywjenja w interneśe wugótowaś.
6. Efektiwita interneta ako zjawna resursa wótwisujo wót komunikacije mjazy sobu (protokole, datowe formaty, wopśimjeśe), inowacije a decentralnego wobźělenja swětodaloko.
7. Dermotna software z wótwórjonego žrědła spěchujo wuwijanje interneta ako zjawnu resursu.
8. Transparentne procese na zakłaźe zgromaźeństwa mócuju wobźělenje, zagronitosć a dowěru.
9. Komercielne wobźělenje na wuwiśu interneta pśinjaso wjele lěpšynow; balansa mjazy komercielnym profitom a zjawnym wužytkom jo rozsudna.
10. Mócowanje aspektow zjawnego wužytka interneta jo wažny zaměr, kótaryž jo gódny nałožka na casu, zajmowanosći a angažemenśe.

Spěchowanje manifesta Mozilla

Jo wjele rozdźělnych wašnjow, principy manifesta Mozilla zwopšawdniś. Witamy šyroku paletu aktiwitow a wócakujomy tu samsku kreatiwnosć, kótaruž wobźělniki na projekśe Mozilla su na drugich pólach projekta pokazali. Za jadnotliwcow, kótarež njejsu do projekta Mozilla dłymoko zapśěgnjone, jo zakładna a wjelgin efektiwna móžnosć, manifest pódpěraś, Mozilla Firefox a druge produkty wužywaś, kótarež symbolizěruju principy manifesta.