L'istorgia dals navigaturs
L'istorgia dal mund enconuscha bleras lutgas per la pussanza, da tirans che han conquistà il mund e dad adversaris marginalisads che han fatg resistenza eroica. L'istorgia dals navigaturs-web n'è betg talmain differenta. Pioniers en las universitads han sviluppà ina simpla software che ha dà l'impuls per ina revoluziun en il sectur d'infurmaziun. E quella ha manà ad in cumbat per la dominanza tranter ils navigaturs e per l'acceptanza dals utilisaders da l'internet.
Avant l'èra dal web
L'onn 1950 emplenivan computers entiras stanzas ed eran main intelligents ch'ils calculaturs da giagloffa d'ozendi. Dentant è il progress impressiunant. Gia ils onns 1960 eran ils computers abels dad exequir programs cumplexs. Regenzas ed universitads en tut il mund eran fascinads da l'idea da laschar communitgar las maschinas ina cun l'autra per promover la collavuraziun ed innovaziuns scientificas.
ARPANET è stà l'emprim project da rait che ha gì success. Il 1969 è per l'emprima giada vegnì tramess in messadi dad in computer dal labor scientific da l'Universitad da California, Los Angeles (UCLA) al Stanford Research Institute (SRI), er en la California.
Quai ha causà ina revoluziun en connex cun la colliaziun da computers. Novas raits èn sa furmadas ed han collià universitads e centers da perscrutaziun en tut il mund. Ils suandants 20 onns n'era l'internet dentant betg anc accessibel per il public. L'access era resalvà a perscrutaders dad universitads ed autoritads, a students ed a firmas privatas. I deva dunsainas da programs ch'eran abels da barattar infurmaziuns via lingias da telefon, ma lur applicaziun era cumplitgada. L'internet avert en il vair senn dal pled e l'emprim navigatur-web èn vegnids creads pir ils onns 1990.
L'èra dal web
L'informaticher britannic Tim Berners-Lee ha sviluppà l'emprim server da web e l'emprim navigatur-web visual l'onn 1990 cura ch'el ha lavurà al CERN, l'Organisaziun europeica per la perscrutaziun nucleara, en Svizra. El ha numnà sia nova fanestra a l'internet «WorldWideWeb». I sa tractava dad ina interfatscha grafica simpla d'utilisar, concepida per il computer NeXT. Uschia èn vegnids colliads per l'emprima giada documents da text cun agid d'ina rait accessibla per il public: L'internet co nus l'enconuschain.
In onn pli tard ha Berners-Lee dumandà la studenta da matematica Nicola Pellow che lavurava era al CERN da scriver il Line Mode Browser, in program per terminals da basa da computers.
Gia l'onn 1993 aveva l'internet cuntanschì ina gronda popularitad. Universitads, regenzas ed interpresas privatas han scuvert il potenzial da l'internet avert. Per acceder a l'internet duvrava mintgin novs programs da computer. Lez onn ha l'informaticher Marc Andreessen dal National Center for Supercomputing Applications (NCSA) a l'Universitad dad Illinois Urbana-Champaign sviluppà Mosaic. I sa tracta da l'emprim navigatur-web popular e dal precursur tempriv da MozillaFirefox.
NCSA Mosaic funcziunava sin computers da Windows, era simpel d'utilisar e permetteva a mintgin cun in PC l'access a las emprimas paginas d'internet da quella giada, a locals da chat ed a bibliotecas da maletgs. L'onn suandant (1994) ha Andreessen fundà Netscape ed ha publitgà il navigatur-web Netscape. Il success è stà enorm ed ultra da quai eri l'emprim navigatur-web che steva a disposiziun a tut la glieud. Igl è era stà l'emprim pass en ina lutga dad ina nova dimensiun per ils utilisaders da l'internet.
La lutga dals navigaturs-web
Il 1995 n'era il Netscape Navigator betg l'unica via per navigar online. Il gigant da software per software da computers Microsoft ha obtegnì la licenza dal vegl code da Mosaic ed ha sviluppà cun Internet Explorer ses agen access al web. Questa nova ediziun ha provocà ina guerra. Netscape e Microsoft han lavurà sco nars per sviluppar novas versiuns da lur programs. Mintgin ha empruvà da superar l'auter cun products ch'eran mintgamai megliers e pli svelts.
Netscape ha creà e publitgà JavaScript. Quai ha dà a las paginas-web pussaivladads da calculaziun sin in nivel anc mai vesì. (Netscape ha era sviluppà il <blink> tag da renum dubius.) Microsoft ha reagì cun ils Cascading Style Sheets (CSS) ch'èn daventads da qua envi il standard per la creaziun da paginas-web.
Il 1997 è l'entira chaussa escalada in pau cura che Microsoft ha lantschà Internet Explorer 4.0. Il team ha construì in «e» gigantic e l'ha tschentà si dascusamain sin il tschispet dal sez principal da Netscape. Ils emploiads da Netscape han reagì immediatamain ed han cupitgà l'«e» gigantic e l'han remplazzà cun lur agen simbol da Mozilla, il dinosaur mascottin, ch'els han plazzà sisur.
Alura ha Microsoft cumenzà a furnir Internet Explorer cun ses sistem operativ Windows. Entaifer 4 onns ha l'interpresa conquistà ina quota al martgà da 75% ed il 1999 schizunt ina quota da 99%. Per consequenza era l'interpresa confruntada cun in plant per cuntravenziun cunter las leschas davart cartels. L'interpresa Netscape ha decis sin quai da publitgar ses code sco open source ed ha fundà l'organisaziun senza finamira da profit Mozilla avant che metter sin il martgà Firefox l'onn 2002. Cunquai ch'in monopol sin il martgà dals navigaturs n'è betg en l'interess dals utilisaders e l'internet avert, è Firefox vegnì sviluppà per dar als utilisaders da l'internet ina schelta. L'onn 2010 avevan Mozilla Firefox ed autras firmas reducì la quota al martgà da l'Internet Explorer sin 50%.
La fin dals onns 1990 e l'entschatta dals onns 2000 èn entrads en il martgà er auters concurrents, sco p.ex. Opera, Safari e Google Chrome. Cun la publicaziun da Windows 10 l'onn 2015 ha Microsoft Edge remplazzà l'Internet Explorer.
Navigar en l'internet ozendi
Ozendi datti mo paucas modas e manieras per acceder a l'internet. Ils concurrents principals èn Firefox, Google Chrome, Microsoft Edge, Safari ed Opera. Durant il davos decenni èn ils apparats mobils daventads la moda preferida per acceder a l'internet. Ozendi dovra la gronda part dals utilisaders d'internet sulettamain navigaturs mobils ed applicaziuns per ir online. Per apparats iOS e Android stattan a disposiziun versiuns mobilas dals navigaturs ils pli impurtants. Questas applicaziuns èn bain utilas per intents specifics, ma ellas permettan mo in access limità a l'internet.
En l'avegnir vegn il web a s'allontanar anc pli fitg da sias ragischs ipertextualas e porscher vastas experientschas interactivas. La realitad virtuala sa mussa gia dapi decennis a l'orizont (il pli tard dapi che Lawnmower Man è vegnì publitgà il 1992 ed il Nintendo Virtual Boy il 1995). Ma ussa porta forsa il web la realitad virtuala ad in public pli grond. Firefox sustegna ussa WebVR ed A-Frame. Quai pussibilitescha a sviluppaders da crear websites da realitad virtuala a moda svelta e simpla. Ils blers apparats mobils moderns sustegnan WebVR e pon vegnir utilisads senza problems sco headsets cun simplas boxas da chartun. Po dar ch'in web da realitad virtuala 3D tenor il model da l'autur da science fiction Neal Stephenson ans spetga prest. Sche quai avess dad esser il cas, pudess il navigatur-web sez svanir cumplettamain e daventar ina veritabla fanestra en in auter mund.
N'emporta betg tge che l'internet ans porscha en l'avegnir, Mozilla e Firefox vegnan a sustegnair ils utilisaders er vinavant ed als garantir instruments da gronda prestaziun per explorar il web cun tut sias pussaivladads. L'internet è qua per tuts e mintgin duess avair sut controlla sia atgna experientscha en l'internet. Perquai furnin nus Firefox cun utensils per proteger la sfera privata e nus na vendain mai datas dals utilisaders a firmas da reclama.
Resursas
- https://en.wikipedia.org/wiki/Mosaic_(web_browser)
- https://en.wikipedia.org/wiki/History_of_the_web_browser
- https://en.wikipedia.org/wiki/History_of_the_Internet
- https://en.wikipedia.org/wiki/Browser_wars
- https://home.cern/topics/birth-web
- https://www.zdnet.com/article/before-the-web-the-internet-in-1991/