Firefox blochescha improntaders

Tge èn improntaders (fingerprinting)?

Improntaders (fingerprinting) èn fastizaders online ch'èn anc pli invasivs che solits fastizaders a basa da cookies. Ina impronta digitala vegn producida sch'ina interpresa creescha in profil unic da tai che sa basa sin tia hardware, tia software, tes supplements e schizunt sin tias preferenzas. Configuraziuns sco il visur che ti utiliseschas, las scrittiras installadas sin tes computer e schizunt la schelta da tes navigatur pon tuttas vegnir duvradas per crear ina impronta.

Sche ti has in laptop, PC u telefonin derasà èsi eventualmain pli difficil dad identifitgar definitivamain tes apparat cun agid da l'impronta. E dapli supplements, scrittiras e configuraziuns unicas che ti has e pli simpel èsi da ta chattar. Interpresas pon utilisar questa cumbinaziun specifica dad infurmaziuns per crear tia impronta. Perquai blochescha Firefox improntaders, uschia che ti pos anc adina utilisar tias extensiuns preferidas, tes designs e tias persunalisaziuns senza che las reclamas ta suondian.

Improntaders fan donn al web

Improntaders pon ta suandar per mais, perfin sche ti stizzas la memoria da tes navigatur u utiliseschas il modus da navigaziun privat – schizunt sche ti has inditgà cleramain che ti na vulessas betg vegnir fastizà. Malgrà ch'i dat in consens da las instituziuns da standardisaziun ed ils producents da navigaturs che improntaders fan donn al web, è lur diever en la rait s'augmentà constantamain durant l'ultim decenni.

Firefox blochescha improntaders

Il nov navigaturFirefox ta protegia cunter improntaders cun bloccar dumondas da terzas partidas dad interpresas da las qualas igl è enconuschent ch'ellas utiliseschan improntaders. Nus avain lavurà intensivamain per pussibilitar questa protecziun da datas senza tangar il funcziunament da las paginas-web che ti visitas gugent. (Ve a savair dapli sch'ils detagls tecnics t'interessan.)

Igl è facil da chattar las configuraziuns correspundentas. En la versiun la pli actuala dal navigatur Firefox è la bloccada dad improntaders gia activada en la configuraziun da standard. Avra tia survista da la protecziun da datas per reconstruir co che ti vegns fastizà davos las culissas e co Firefox impedescha quai.

Probablamain n'avessas ti betg gugent sch'insatgi ta suandass dapertut en la vita reala. I na dat era nagin motiv dad acceptar quai en la rait. Sche ti n'utiliseschas betg anc Firefox, telechargia e ta protegia cunter improntaders.